हरिः ओम्

Sloka Text in Telugu , Kannada, Gujarati, Devanagari, English

|| ઓમ્ તત્ સત્||

સુન્દરકાંડ.
અથ એકચત્વારિંશસ્સર્ગઃ

સ ચ વાગ્ભિઃ પ્રશસ્તાભિઃ ગમિષ્યન્ પૂજિતસ્તયા|
તસ્માદ્દેશાદપક્રમ્ય ચિંતયામાસ વાનરઃ||1||

અલ્પશેષમિદં કાર્યં દૃષ્ટેયમસિતેક્ષણા|
ત્રીન્ ઉપાયાનતિક્રમ્ય ચતુર્થ ઇહ વિદ્યતે||2||

ન સામ રક્ષસ્સુ ગુણાય કલ્પતે
ન દાનમર્થોપચિતેષુ યુજ્યતે|
નભેદસાધ્યા બલદર્પિતા જનાઃ
પરાક્રમસ્ત્વેવ મમેહ રોચતે||3||

ન ચાસ્ય કાર્યસ્ય પરાક્રમા દૃતે વિનિશ્ચયઃ કશ્ચિદિહોપપદ્યતે|
હતપ્રવીરાહિ રણેહિ રાક્ષસાઃ કથંચિદીયુર્યદિહાદ્ય માર્દવમ્||4||

કાર્યે કર્મણિ નિર્દિષ્ટે યો બહૂન્યપિ સાધયેત્|
પૂર્વકાર્યાવિરોધેન સ કાર્યં કર્તુ મર્હતિ||5||

ન હ્યેક સાધકો હેતુઃ સ્વલ્પસ્યાપીહ કર્મણઃ|
યોહ્યર્થં બહુધા વેદ સ સમર્થોsર્થ સાધને||6||

ઇહૈવ તાવત્કૃતનિશ્ચયો હ્યહં
યદિવ્રજેયં પ્લવગેશ્વરાલયમ્|
પરાત્મ સમ્મર્થવિશેષતત્ત્વવિત્
તતઃ કૃતં સ્યાન્ મમભર્તૃશાસનમ્||7||

કથં નુ ખલ્વદ્ય ભવેત્સુખાગતં
પ્રસહ્ય યુદ્ધં મમરાક્ષસૈઃ સહ|
તથૈવ ખલ્વાત્મબલં ચ સારવત્
સમ્માનયેન્માંચ રણે દશાસનઃ||8||

તતઃ સમાસાદ્ય રણે દશાનનં
સમંત્રિવર્ગં સબલપ્રયાયિનમ્|
હૃદિ સ્થિતં તસ્ય મતં બલં ચ વૈ
સુખેન મત્વાહ મિતઃ પુનર્વ્રજે||9||

ઇદમસ્ય નૃશંસસ્ય નંદનોપમમુત્તમં|
વનં નેત્રમનઃકાંતં નાનાદ્રુમલતાયુતમ્||10||

ઇદં વિધ્વંસયિષ્યામિ શુષ્કં વનમિવાનલઃ|
અસ્મિન્ ભગ્ને તતઃ કોપં કરિષ્યતિ દશાનનઃ||11||

તતોમહત્ સાશ્વમહારથદ્વિપં
બલં સમાદેક્ષ્યતિ રાક્ષસાધિપઃ|
ત્રિશૂલકાલાયસપટ્ટિ સાયુધમ્
તતોમહત્ યુદ્ધમિદં ભવિષ્યતિ||12||

અહં તુ તૈઃ સંયતિ ચંડવિક્રમૈઃ
સમેત્ય રક્ષોભિરસહ્યવિક્રમઃ|
નિહત્ય તદ્રાવણચોદિતં બલં
સુખં ગમિષ્યામિ કપીશ્વરાલયમ્||13||

તતો મારુતવત્ ક્રુદ્ધો મારુતિર્ભીમવિક્રમઃ|
ઊરુવેગેન મહતા દ્રુમાન્ ક્ષેપ્તુ મથારભત્||14||

તતસ્તુ હનુમાન્ વીરો બભંજ પ્રમદાવનં|
મત્તદ્વિજસમાઘુષ્ટં નાનાદ્રુમલતાયુતમ્||15||

તદ્વનં મથિતૈર્વૃક્ષૈઃ ભિનૈશ્ચ સલિલાશયૈઃ|
ચૂર્ણિતૈઃ પર્વતાગ્રૈશ્ચ બભૂવા પ્રિયદર્શનમ્||16||

નાના શકુંતવિરુતૈઃ પ્રભિન્નૈઃ સલિલાશયૈઃ|
તામ્રૈઃ કિસલયૈઃ ક્લાંતૈઃ ક્લાંતદ્રુમલતાયુતમ્||17||

ન બભૌ તદ્વનં તત્ર દાવાનલહતં યદા|
વ્યાકુલાવરણા રેજુઃ વિહ્વલા ઇવ તા લતાઃ||18||

લતાગૃહૈઃ ચિત્રગૃહૈશ્ચ નાશિતૈઃ
મહોરગૈર્વ્યાળ મૃગૈશ્ચ નિર્દુતૈઃ|
શિલાગૃહૈરુન્મધિતૈઃ તથા ગૃહૈઃ
પ્રણષ્ટરૂપં તદભૂન્મહત્ વનમ્||19||

સા વિહ્વલાઽશોકલતાપ્રતાના વનસ્થલીશોકલતાપ્રતાના|
જાતા દશાસ્યપ્રમદાવનસ્ય કપેર્બલાદ્દિ પ્રમદાવનસ્ય||20||

સ તસ્ય કૃતાર્થપતેર્મહાકપિઃ મહદ્વ્યળીકં મનસો મહાત્મનઃ|
યુયુત્સુરેકો બહુભિઃ મહાબલૈઃ શ્રિયા જ્વલન્ તોરણમાસ્થિતઃ કપિઃ||21||

ઇત્યાર્ષે શ્રીમદ્રામાયણે આદિકાવ્યે વાલ્મીકીયે
ચતુર્વિંશત્ સહસ્રિકાયાં સંહિતાયામ્
શ્રીમત્સુન્દરકાંડે એકચત્વારિંશસ્સર્ગઃ ||

|| Om tat sat ||